Клубот од Евертон официјално го објави отказот за тренерот Френк Лампард. Поранешниот англиски репрезентативец минатата година беше поставен на чело на клупата на „Гудисон Парк“, но се чини дека разочарувачките резултати на Евертон сезонава го убедија раководството на клубот во преземениот чекор.
Евертон беше поразен од Вест Хем во последниот натпревар во Премиер лигата, а со тоа имаше 9 порази во 12 натпревари за тимот кој е претпоследен во генералниот пласман во англискиот шампионат. Евертон го остави зад себе само Саутемптон во поредокот, но тоа е и благодарение на гол-разликата, бидејќи екипите имаат ист број бодови. Тимот беше елиминиран и во ФА Купот од Манчестер Јунајтед, откако загуби со 3-1. Севкупно, Евертон има обезбедено само 3 победи оваа сезона.
Пред отказот на Лампард, раководството на клубот се соочуваше и со притисок од навивачите, кои бараат вистински промени и нови пристапи од бордот. Потсетуваме дека Евертон се уште нема донесено нови играчи во тимот на овој пазар. И покрај тоа што клубот потроши огромни 80 милиони фунти во текот на летото, се чини дека засилувањата го немаа посакуваниот ефект.
И минатата сезона Евертон на Френк Лампард мина низ прилично тежок период. Во последните 18 натпревари, тимот претрпе 10 порази, а успеа да обезбеди опстанок во Премиер лигата, само во победата против Кристал Палас. Сепак, очекувањата за оваа сезона беа поинакви, а се чини дека клупските челници не сакаа дополнително да ризикуваат.
Во меѓувреме, во однос на иднината на клупата на Евертон, се уште не е јасно кој ќе биде наследникот на Лампард. Англиските медиуми навестуваат дека легендата на клубот Данкан Фергусон е еден од силните кандидати за тренерската позиција. Сепак, раководството на клубот се уште ги разгледува сите можности.
