Претседателот на Атлетико Мадрид, Енрике Серезо ги отфрли информациите минатата недела дека ѕвездата на Манчестер Јунајтед, Кристијано Роналдо би можел да му се приклучи на шпанскиот клуб. Португалецот јасно стави до знаење дека сака да ги напушти „црвените ѓаволи“, бидејќи сака да игра за тим во Лигата на шампионите.
Но, спротивно на досега објавеното, Атлетико Мадрид нема да биде еден од нив. Ова го гарантира претседателот на Мадрид, Енрике Серезо, кој за радиото El Partidazo de COPE изјави:
„Не знам кој ја измислил приказната за Кристијано Роналдо и Атлетико Мадрид. Очигледно тоа не е вистина. Практично, невозможно е тој (Роналдо) да игра за Атлетико Мадрид“.
Меѓу другите тимови кои се поврзуваа со португалската ѕвезда беше и Челзи. Сепак, тимот на Томас Тухел го прекина својот интерес пред извесно време. Како една од можните дестинации на Роналдо се споменуваше и Баерн Минхен, особено по заминувањето на Левандовски од Баварците. Сепак, германските спортски претставници сметаат дека профилот на CR7 е несоодветен за модулот за играње на Баерн.
До сега немаше конкретна понуда за услугите на Кристијано Роналдо од европските клубови. Медиумите во Англија објавија дека напаѓачот одбил голема понуда од 210 милиони фунти од Саудиска Арабија, бидејќи во овој момент од кариерата не е заинтересиран за оваа дестинација.
Португалецот се врати во тренинзите на Јунајтед, по долго отсуство поради одмори и некои други лични причини. Се дознава дека ЦР7 го повторил истото барање до клупските челници, кои се обидуваат да најдат алтернативи за да избегнат губење на еден од нивните највредни играчи.
