Челниците на Манчестер Јунајтед може да го пуштат Кристијано Роналдо да си замине овој летен пазар, врз основа на прилично проблематичната ситуација со која се соочува клубот. И покрај зборовите на тренерот Ерик тен Хаг, дека Португалецот не е на продажба, други важни фигури во хиерархијата на „црвените ѓаволи“ мислат поинаку.
Одредени извори во близина на клубот наведуваат дека ЦР7 има негативно присуство во соблекувалната, не комуницира многу со соиграчите, а пред се отворено ја изразил својата желба да си замине. Напаѓачот има уште една година од актуелниот договор, но шокантните порази од Брајтон и Брентфорд изгледа повторно ја разгореа дебатата за улогата на бомбардерот на Олд Трафорд.
Други гласови блиски до клубот изјавија за Би-Би-Си дека постои чувство дека заминувањето на Роналдо ќе доведе до намалување на тензиите во соблекувалната, а на крајот и подобри настапи. Поранешниот дефанзивец на Манчестер Јунајтед, Гери Невил ја коментираше ситуацијата со CR7 за Sky Sports. Тој рече:
„Мора да се донесе важна одлука за Роналдо. Тој очигледно не е среќен. Проблемот е ако го загубат, нема ништо во делот за голови од поле. Мислам дека ако тој замине и не доведат други играчи, Јунајтед би можел да ја заврши сезоната во долниот дел од табелата“.
Минатата сезона Роналдо беше најдобар стрелец на Јунајтед, а трет во Премиер лигата. Сепак, клубот не успеа да се пласира во Лигата на шампионите, завршувајќи го првенството на 6-то место.
Доколку Роналдо си замине, управниот одбор на „црвените ѓаволи“ го чека тешка мисија, бидејќи пристапот на нови играчи пропадна во последните недели на пазарот. Главна причина беше фактот што Јунајтед оваа сезона нема да игра во Лигата на шампионите.
