Тренерот на Манчестер Јунајтед, Ерик тен Хег се соочува со важна дилема во врска со летниот преоден рок. „Црвените ѓаволи“ имаат речиси 100 милиони фунти за нов напаѓач, а двете главни имиња кои би можеле да играат на „Олд Трафорд“ следната сезона се Хари Кејн и Виктор Осимхен од Наполи. Со оглед на тоа што и двете алтернативи изгледаат како остварливи за мисијата, на Тен Хег останува да ги одмери опциите, за да одреди кој играч најдобро одговара на неговата визија за Јунајтед.
Извори блиски до клубот сугерираат дека иако Хари Кејн веќе неколку сезони се докажа во Премиер лигата, на Виктор Осимхен повеќе му одговара она што Холанѓанецот ќе го создаде во Јунајтед. Покрај способноста за постигнување голови, фудбалерот на Наполи е брз, физички супериорен и доста агресивен во пресингот. Сите овие атрибути доста добро се вклопуваат во стилот на игра на Тен Хег.
Последниот го следи напаѓачот на Наполи од минатото лето, а иако има некои сомнежи околу неговите повреди, се смета дека Осимхен е на врвот на листата на менаџерот на Јунајтед во нападот.
Сепак, не се очекува претседателот на Наполи, Аурелио Де Лаурентис лесно да се откаже од Нигериецот, бидејќи за неговите услуги се заинтересирани и Челзи и Пари Сен Жермен. Но, трансферот на Хари Кејн не е лесна мисија, бидејќи претседателот на Тотенхем, Даниел Леви не претпочита играчот да стане дел од тим во Премиер лигата.
Сепак, Леви може да биде принуден да се „пушти“, со оглед на тоа што следната сезона Кејн ќе влезе во последната година од актуелниот договор со клубот. Имајќи го тоа кажано, Тотенхем не може да ризикува да го загуби Кејн по нула цена, а тоа му дава предност на Јунајтед, доколку Црвените Ѓаволи решат да се фокусираат на англискиот бомбардер.