Ливерпул е подготвен да направи се за да го донесе талентот на Бенфика, Дарвин Нуњез на „Енфилд“. Уругвајскиот напаѓач е една од најперспективните ѕвезди на европската сцена, а тоа секако значи дека конкуренцијата за неговиот картон е доста жестока. Но, „црвените“ немаат намера да се откажат и според информациите се подготвени да го соборат личниот рекорд на клубот за најскап трансфер.
Новиот спортски директор на Ливерпул, Џулијан Вард, е во преговори со Бенфика и се вели дека Нуњез сериозно размислува за преселба на Енфилд. Нападот е најприоритетниот оддел за Англичаните на овој пазар, со оглед на комплицираната ситуација на Садио Мане и Мохамед Салах, кои се блиску до заминување од клубот.
Нуњез во меѓувреме постигна 6 гола во Лигата на шампионите минатата сезона, 2 дури и против Ливерпул во четврт-финалето. Ова секако го привлече вниманието на Јирген Клоп, кој пред неколку недели се изрази за 22-годишниот:
„Шармантно момче! Но и прилично добар играч...Тој беше физички силен, брз и мирен пред голот. Секогаш во овие ситуации велам дека ако е физички здрав, пред него е голема кариера“.
Долго време всушност Атлетико Мадрид изгледаше како најблиската дестинација за Нуњез, но интересот од Премиер лигата од ден на ден се зголемува. Тука може да се спомене и Манчестер Јунајтед. Но, „црвените ѓаволи“ имаат голем недостаток и тоа е токму фактот што следната сезона нема да играат во Лигата на шампионите. Нуњез секако ја посакува таа можност, во овој момент од неговата кариера. Напаѓачот има постигнато вкупно 34 гола на 41 настап за Бенфика, а сега е редовен стартер во репрезентацијата на Уругвај.
