Баерн Минхен по секоја веројатност нема да го ангажира Жоао Кансело на крајот од сезоната. Португалскиот дефанзивец моментално е на позајмица во германскиот гигант од Манчестер Сити. Договорот за позајмица предвидува можност Баерн да го купи картонот на крајот од сезоната, но се чини дека Баварците нема да ја активираат оваа клаузула.
Кансело доста добро ја започна својата авантура во Баерн, со 2 асистенции на првите 2 средби, но потоа ситуацијата се промени, а не во корист на дефанзивецот. Фудбалерот е оставен на клупата на последните натпревари, вклучувајќи го и предизвикот против ПСЖ во Лигата на шампионите. Кансело беше активиран само во последните минути од мечот како замена.
Според престижниот Calciomercato, тренерот на Баерн, Џулијан Нагелсман, не е целосно задоволен од начинот на кој Кансело ги спроведе своите упатства на теренот и се смета дека ова е главната причина зошто дефанзивецот не е активиран како стартер.
Врз основа на последните извештаи, доколку Жоао не потпише со Баерн на лето, 2 главни опции за неговата иднина се Реал Мадрид и Челзи. Малку е веројатно дека ќе се случи враќање во Сити бидејќи тренерот Гвардиола преку своите одлуки јасно стави до знаење дека Португалецот е заменлив играч.
Кога позајмицата на Кансело беше официјализирана, Гвардиола рече:
„Тој (Жоао) замина затоа што сака да ги игра сите натпревари. Се надевам дека ќе може да го направи тоа во Германија во следните 4 месеци, а потоа не знам што ќе се случи следната сезона“.
Талентираниот дефанзивец се уште има време да ја подобри својата позиција во Баерн, но во исто време мора да размислува и за иднината, бидејќи конечната преселба во Германија најверојатно нема да се случи со оглед на неговиот трансфер од 62 милиони фунти.
