Арсеналот на Микел Артета ја подготвува листата на цели за јануарскиот пазар. Меѓу имињата кои се поврзуваат за можен трансфер кај „топчиите“ е и тоа на напаѓачот на Евертон, Доминик Калверт-Лјуин. Шпанскиот тренер на Арсенал во фудбалерот гледа совршена замена за Александар Лаказет кој се очекува да си замине на лето.
Ова е уште една негативна вест за тренерот на Евертон, Рафа Бенитез. Техничарот јавно призна дека повредата на Калверт-Лјуин ги нарушила неговите планови и стратегија за игра. Во случај играчот на крајот да го напушти клубот, ова може да биде голем удар за шпанскиот тренер.
Англискиот напаѓач има активен договор со клубот до 2025 година. Во меѓувреме Бенитез од своите изјави навести дека ќе се бори до крај да ги задржи во клубот своите важни играчи. Сепак, ситуацијата е комплицирана.
Самиот тренер на Евертон изјави дека клубови како Ливерпул успеале со продажба на играчи и собирање средства, во вистинско време. Тоа значи дека доколку Арсенал понуди релативно висока цифра за услугите на Доминик Калверт-Лјуин, можеби е во интерес на Евертон да ја прифати понудата.
Напаѓачот интензивно се развиваше во Евертон во последните две сезони, под водство на тренерот Карло Анчелоти. Неговите импресивни игри му обезбедија на играчот место во англиската репрезентација за време на Европското, но оваа сезона ситуацијата изгледа потешка за фудбалерот. Повредата на бутот ќе го оддалечи од терените, барем до крајот на месецот. Ова може да влијае на финансиската понуда што Арсенал ќе ја подготви за играчот. Но, и покрај повредата, Доминик Калверт-Лјуин останува фудбалер со многу потенцијал, кој може да биде совршено решение за Арсенал во развој на Микел Артета.