Обидот на Роман Абрамович да ги продаде акциите на клубот од Челзи е стопиран од англиската влада. По ризикот од можни санкции против него, како резултат на преземените мерки против руските олигарси, претседателот на Челзи донесе одлука да го стави на продажба лондонскиот клуб. Но, британските власти го „замрзнаа“ имотот на Абрамович, вклучувајќи го и фудбалскиот клуб.
Ова го става Челзи на многу деликатна крстосница, бидејќи целта на властите е да го спречат Абрамович да има паричен приход од тимот. Владата спроведе посебен план според кој персоналот и играчите ќе продолжат редовно да добиваат плата, барем до крајот на сезоната. Исто така, претплатата што навивачите ја купија за да ги следат натпреварите на Челзи во живо оваа сезона ќе продолжи да важи.
Но, се очекува иднината да биде доста тешка. Челзи нема да може да продава или купува нови играчи. Исто така, официјалната клупска продавница ќе биде затворена. Англиската влада размислува за уште една посебна мерка, а тоа е изработка на лиценца со која се овозможува продажба на клубот во иднина, но под услов Абрамович да не оствари никаков приход од работењето.
Сите овие мерки ќе му зададат голем удар на Челзи, кој многу тешко ќе биде конкурентен во првенството и Европа, доколку мерките продолжат да останат на сила уште долго.
Абрамович пред неколку дена изјави дека парите добиени од продажбата на клубот ќе одат за помош на жртвите од војната. Но, очигледно тоа нема да се случи бидејќи рускиот милијардер де факто ја загуби сопственоста на Челзи. Спортските аналитичари на BBC Sport, но и навивачите на тимот изразија песимизам за иднината на тимот, велејќи дека ги чека тежок пат.
