Манчестер Јунајтед изгледа најде алтернативен начин да го задржи Кристијано Роналдо во тимот, без да предизвика незадоволство кај Португалецот. 37-годишниот фудбалер е блиску до трансфер во Атлетико Мадрид, но „црвените ѓаволи“ се уште не се подготвени да се откажат од него. Поради оваа причина, челниците на Јунајтед излегоа со конкретен предлог кој го изненади напаѓачот.
Англичаните се подготвени да го пуштат ЦР7 да си замине, само во форма на позајмица. Условот на Јунајтед е Роналдо да мора да ја активира опцијата за продолжување на договорот со клубот, потпишувајќи на уште една година со тимот на Тен Хаг. Тоа значи дека по оваа сезона како позајмен може да се врати следната сезона за уште еднаш да игра со „црвените ѓаволи“.
Тен Хаг се надева дека по оваа сезона тимот ќе игра во Лигата на шампионите, а тоа ќе биде доволно да го убеди Роналдо да се врати по позајмицата. Некои клучни фигури во клубот се уште се скептични за првата сезона на холандскиот тренер на чело на тимот, но надежите за место во првата четворка во Премиер лигата се големи.
Според престижниот Мирор во Англија, предлогот на клубот го изненадил ЦР7 заедно со неговиот агент Жорге Мендеш. Сепак, дуото не ја отфрли алтернативата на клубот. Челниците на Јунајтед добро знаат дека доколку Португалецот не е среќен, тоа би му донело големи проблеми на Ерик тен Хаг. И не се работи само за перформансите на тимот на теренот. Тренерот работи напорно за да создаде подобра хармонија во соблекувалната, по постојаните проблеми кои се случуваа минатата сезона.