Фил Фоден потпиша нов договор со Манчестер Сити. Англискиот играч за врска ќе биде дел од „граѓаните“ до 2027. Претходниот договор му истекуваше следната година и челниците на Сити внимаваа да не ја комплицираат ситуацијата со еден од своите најдобри играчи.
Фоден има постигнато вкупно 52 гола на 182 натпревари со англискиот тим, бројка која е доста висока ако се земе предвид дека неговата примарна улога не е напаѓачка. Самиот играч беше доста среќен поради обновувањето, уште еднаш изразувајќи ја својата лојалност кон Сити. Фоден коментираше:
„Тешко е да се опише со зборови колку сум среќен што го потпишав овој договор. Тоа е остварување на сонот. Цел живот сум навивач на Сити. Овде тренирав многу години и исто така бев топ-бој. Го сакам овој клуб толку многу и да знам дека ќе бидам дел од него до 2027 година е фантастично чувство“.
Фоден има освоено вкупно 11 трофеи со Манчестер Сити, вклучувајќи 4 трофеи во Премиер лигата, 4 ЕФЛ купови и ФА Купот. Англискиот играч за врска е награден и за најдобар играч на сезоната во Премиер лигата.
Фоден изјави дека Пеп Гвардиола има голема заслуга за неговиот брз развој во последните години. Тој го пофали шпанскиот техничар и рече:
„Многу се подобрив во последните неколку години и многу од тоа е благодарение на Пеп и неговиот персонал, кои ме водат секој ден на тренинзите. Работата со нив ми дава уште повеќе шанси да се подобрам и да станам најдобриот играч што можам да бидам“.
