Тренерот на Барселона, Чави Ернандез изјави дека е во постојан контакт со Лео Меси, а аргентинската суперѕвезда секогаш има отворена врата за Барселона. Од заминувањето на Меси од Каталонците во 2021 година, гласините за можно враќање на Камп Ноу секогаш се активни. Неодамна таткото и агентот на Аргентинецот, Хорхе Меси, повторно се сретнал со претседателот на Барселона, за да разговараат за иднината на суперѕвездата, која веќе е активна во ПСЖ.
Последните случувања ги коментираше и тренерот Чави, кој доста позитивно се изрази за можното враќање на „болвата“ на Камп Ноу. Шпанскиот техничар рече:
„И претходно кажав дека ова е негова куќа и вратите се отворени, тој ми е пријател и постојано одржуваме контакт. Се ќе зависи од него, што сака во иднина. Ова е неговиот дом, без сомнение. Најдобриот фудбалер во историјата сигурно секогаш ќе се вклопи во тимот“.
Претседателот на Барселона, Жоан Лапорта никогаш не ја криел желбата да го врати Меси на Камп Ноу, но и бил претпазлив, прифаќајќи ги тешкотиите на оваа операција.
Во случај Аргентинецот во иднина повторно да игра за Барселона, природно се поставува прашањето како ќе се трансформира моделот на игра кој моментално го постави Чави во тимот. Оваа тема на разговор ги подели навивачите на клубот во две групи, некои од нив сметаат дека Меси има уште многу да и даде на Барселона, додека други се на мислење дека враќањето на бројот 10 може да ја спречи трансформацијата на Барселона и излезот на сцената на новите таленти. Сепак, ова останува да се види бидејќи во моментов челниците на шпанскиот клуб се уште немаат конкретна стратегија како да го вратат Меси во Шпанија.
