Унаи Емери го даде своето прво интервју како нов тренер на Астон Вила, во пресрет на мечот со Манчестер Јунајтед во првенството. Шпанскиот техничар се изрази доста среќен поради новата авантура, бидејќи изјави дека негов сон и главен приоритет е да освои трофеј со англискиот клуб. Потсетуваме дека ова не е прв пат Емери да биде на чело на тим во Премиер лигата. 51-годишниот тренер беше на чело на Арсенал во сезоната 2018-2019. Тренерот за медиумите изјави:
„Мојот сон е да освојам трофеј со Астон Вила. Тоа е мој личен предизвик на почетокот. Вториот сон е да играм во Европа“.
Емери се докажа неколку пати на европската арена, бидејќи ја предводеше Севиља до 3 успеси во Лигата на Европа, кревајќи го трофејот во сезоните 2013-2014, 2014-2015 и 2015-2016. По заминувањето од Арсенал, техничарот му се приклучи на Виљареал каде успеа повторно да ја освои Лигата на Европа. Емери додаде:
„Играв против многу тимови во светот. За мене да се соочам со англиски тимови е голем предизвик. Премиер лигата е веројатно шампионатот број 1 во светот. Секој тим ни даде искуство кога раководев со Арсенал... Среќен сум што сум тука. Решив да дојдам овде бидејќи тоа е голем проект, а нашата амбиција ќе оди заедно, чекор по чекор. Сакам да го подобрам тимот, да помогнам со моите искуства“.
Сепак, Емери изјави дека тимот треба да размислува само за следниот натпревар, кој ќе биде против Јунајтед на домашен терен. Техничарот рече:
„Мораме да размислуваме само за следниот натпревар бидејќи не сме во добра позиција во поредокот. Секој предизвик ќе ни даде многу информации за играчите. Сакам да ги тестирам индивидуално и групно. Следниот натпревар е мојот единствен фокус“.
