Тренерот на Арсенал, Микел Артета изјави дека без разлика како ќе заврши трката за титулата во Англија, неговиот тим оваа сезона направил голем напредок. Лондончани се соочуваат со Нотингем Форест, кој е загрозен од испаѓање, а поразот од Арсенал на овој натпревар автоматски ќе му ја донесе титулата на Сити. Тимот на Артета е на 4 бода од „граѓаните“ и шампионската титула веќе изгледа речиси невозможна цел, но Артета одбра да се фокусира на позитивниот аспект од развојот на Арсенал:
„Изградивме силна база. Има многу квалитет, има многу млади и ентузијастички играчи, а опкружени сме и со добри луѓе со соодветно искуство и многу лидерство во нив. Мора да продолжиме да го правиме истото бидејќи барањата, очекувањата и предизвиците ќе бидат уште поголеми следната сезона“.
Потсетуваме дека од почетокот на првенството, па се до февруари, Арсенал доживеа само еден пораз во Премиер лигата, создавајќи убедлива разлика на врвот на табелата. Сепак, во втората половина од сезоната, нерешените резултати против Ливерпул, Вест Хем и Саутемптон видоа дека Сити го зазеде првото место. На прашањето на новинарите дали сезоната на Арсенал заврши со болна нота, Артета додаде:
„Зависи каква е болката. Имавме многу добри моменти каде бевме задоволни од тоа што го направивме. Болката е дел од играта, кога не победувате, кога не настапувате на вистинското ниво, мора да се чувствувате вознемирени. Мора да биде вистинската болка за да можете да ја искористите за да се подобрите и да најдете решенија и одговори за да заработите повеќе“.
Арсенал ќе ги одигра последните 2 натпревари од сезоната во Премиер лигата против Нотингем Форест и Челзи.
