Манчестер Јунајтед го брка португалскиот талент Жоао Феликс, но Атлетико Мадрид изгледа им отежнува на „црвените ѓаволи“. Шпанците бараат да се договорат за позајмица до крајот на сезоната за 9.5 милиони фунти, а потоа и гаранција од Јунајтед за на крајот да ја купат картата на Феликс. Атлетико Мадрид го цени играчот на 70.5 милиони фунти.
На напаѓачот му е дозволено да ја напушти „Ванда Метрополитано“, бидејќи повеќе не е во плановите на тренерот Диего Симеоне. Тоа е затоа што Феликс не успева да се претстави константно од неговиот трансфер од Бенфика во мадридскиот клуб.
Јунајтед во моментов е еден од клубовите кои водат во трката за картата на играчот. На тренерот Ерик тен Хаг му треба засилување во нападот, особено по заминувањето на Кристијано Роналдо. Англиските медиуми пишуваат дека раководните лица на Јунајтед се сретнале со извршниот директор на Атлетико, Мигел Анхел Гил, за да разговараат за договор, но Шпанците ја одбиле првата понуда на „црвените ѓаволи“ од 3 милиони фунти за Феликс на позајмица.
Атлетико им даде рок на Англичаните до средината на неделата да излезат со нова понуда, а се смета дека Шпанците вршат притисок бидејќи има и други клубови заинтересирани за картата на Феликс. Меѓу нив е и Арсенал, кој минатото лето беше блиску до потпис со Португалецот. Се очекува лондончани многу брзо да излезат со својата понуда, а Јунајтед ќе има 48 часа да одговори со контрапонуда.
Феликс успеа да постигне гол на последниот натпревар на Атлетико во Ла Лига против Елче. Сепак, се уште не е сигурно дали тренерот Симеоне ќе го одбере напаѓачот за важниот предизвик против Барселона в понеделник.
