Претседателот на Ла Лига, Хавиер Тебас изјави дека е голема можноста Килијан Мбапе следната сезона да дојде во Реал Мадрид. Иднината на француската суперѕвезда постојано беше предмет на шпекулации, а тие само се зголемуваа, сега кога договорот на Мбапе е блиску до истекување на крајот од сезоната. И покрај тоа што следната дестинација на Французинот се уште не е јасна, се чини дека изборот секогаш бил помеѓу Реал Мадрид и ПСЖ.
Во меѓувреме, во едно неодамнешно интервју, Тебас го изрази својот оптимизам за можен трансфер на Мбапе во Реал Мадрид. Претседателот на Ла Лига рече:
„Мислам дека можноста е голема. Ова е лично мислење. Зборуваме за 26-годишен играч... Ќе зависи од Реал Мадрид, претседателот и што ќе бидат подготвени да понудат. Доаѓањето на Белингем веќе му даде ѕвезда на Реал, Винисиус е друга. Ако тој (Мбапе) сака да оди во Мадрид, тогаш би рекол дека има повеќе од 50% шанси тоа да се случи“.
Тебас, исто така, во минатото лобираше Килијан Мбапе да премине во Реал Мадрид. Претседателот на Ла Лига отиде уште подалеку со своите изјави, опишувајќи ја Лига 1 како неконкурентно првенство. Овој потег уследи по одлуката на Мбапе да остане во ПСЖ во 2022 година, и покрај тоа што беше поблиску од кога било до преселба во Мадрид.
Во меѓувреме, самиот напаѓач во своето последно интервју призна дека се уште не одлучил за иднината. Мбапе изјави дека во моментов е фокусиран на ПСЖ. Парижаните имаат уште многу да се борат оваа сезона во Лига 1, но секако и во Лигата на шампионите.
