Се очекува Манчестер Сити на летниот пазар да достави официјална понуда за играчот од средниот ред на Вест Хем, Лукас Пакета. Челниците на Манчестер Сити минатото лето беа подготвени да го доведат Бразилецот на „Етихад“, но овој беше казнет од Англиската фудбалска асоцијација поради кршење на правилата за поставување на спортски облози. Сега се очекува 26-годишниот фудбалер да биде ослободен од обвиненијата и тоа може да го отвори патот за негов трансфер во Манчестер Сити.
Според изворите на Football Insider, Вест Хем нема да го спречи играчот од средниот ред да си замине доколку сака и доколку Сити излезе со задоволителна финансиска понуда. Управниот одбор на „граѓаните“ начелно се договорил со челниците на Вест Хем, да плати 80 милиони евра за картонот на Пакета. Сепак, по веста за престапите на Бразилецот, менаџерите на Манчестер Сити беа принудени да се фокусираат на други алтернативи, особено на Матеус Нунес од Волвс.
Сега повторно е отворен патот Пакета да му се приклучи на Сити. Фудбалерот е активиран нормално и со Вест Хем и со бразилската репрезентација и покрај проблемите со спортските обложувалници. Фудбалерот оваа сезона одигра вкупно 33 натпревари во сите натпреварувања, а има постигнато 7 голови и 6 асистенции.
Бразилецот дојде во Вест Хем од француски Лион во 2022 година и има активен договор со клубот до 2027 година, со опција за продолжување на дополнителна година. Пакета е еден од најважните играчи во тимот на Дејвид Мојс и несомнено ќе биде огромна загуба за клубот доколку замине.
Во меѓувреме во Манчестер Сити, потребата за играч од средниот ред е се поголема. Минатата сезона Гундоган и Махрез си заминаа од „Етихад“, додека оваа сезона Кевин де Брујн постојано се мачеше со повреди. Следствено, Гурадиола сака да има повеќе опции во средниот ред, а Пакета е совршена алтернатива за „граѓаните“.