Лео Меси им се извини на соиграчите во ПСЖ за неовластеното патување на клубот во Саудиска Арабија. Аргентинецот поради ова патување беше суспендиран на две недели од ПСЖ, додека многу медиуми објавија дека Меси ќе го напушти Париз на крајот на сезоната и нема да има продолжување на договорот. Суперѕвездата првпат реагираше по суспензијата од клубот, велејќи:
„Жал ми е за тоа што го направив и чекам клубот да донесе одлука. Искрено мислев дека ќе имаме слободен ден по натпреварот, како што се случи во претходните недели. Го договорив патувањето во Саудиска Арабија откако еднаш го откажав. Овој пат не можев да го откажам“.
Тренерот на ПСЖ, Кристоф Галтие изјави дека нема врска со одлуката за суспензија на Лео Меси. Галтие ги осуди и протестите на навивачите во близина на домовите на играчите. Французинот коментираше:
„Суспензијата на Лео е уште еден фактор за нашите лоши настапи како тим, но не можеме да се криеме зад тоа. Одлуката не е за мене, за тоа бев информиран од други. Не беше добар период... За протестите во близина на куќите на играчите мора да бидеме внимателни. Приватниот живот треба да остане таков. Го разбирам гневот и фрустрацијата на нашите навивачи. Може да протестирате во близина на канцелариите на ПСЖ или по натпревар на Паркот на принцовите, но јас не можам да го прифатам тоа во нечиј дом...“
ПСЖ води во францускиот шампионат со 5 бода од најблискиот ривал, но повторно не успеа да триумфира во Лигата на шампионите, главната цел на клубот во последните години. Парижаните беа елиминирани и од Купот на Франција, уште еден пораз кој остави горчлив вкус кај навивачите на клубот.