Челниците на Манчестер Сити сакаат да го доведат Џамал Мусиала на „Етихад“ во претстојниот летен преоден рок. Мусијала во последните години стана еден од најважните играчи на Баерн Минхен и покрај тоа што играчот има само 21 година. Германецот, кој порасна во Англија, поседува квалитети кои тренерот Гвардиола ги обожава на теренот.
Мусиала постигна многу важен гол, кој на Баерн Минхен му ја донесе титулата во Бундеслигата минатата сезона, во последниот натпревар. Токму менталитетот на германскиот талент, во натпреварите каде притисокот е голем, го прави уште посовршен за тимот предводен од Гвардиола. Потребата од алтернативи во средниот ред исто така е зголемена, бидејќи Де Бруин се мачеше со повреди оваа сезона, додека Махрез и Гундоган си заминаа во текот на летото.
Разбирливо е дека Баерн Минхен никогаш не сака да загуби еден од своите најдобри и најперспективни играчи за иднината. Но, челниците на Сити ќе подготват финансиска понуда премногу тешка за одбивање. Англиските медиуми објавија дека „граѓаните“ се подготвени да понудат околу 120 милиони фунти за Мусиала. Оваа бројка би го соборила актуелниот клупски рекорд за најскап трансфер, оној на Џек Грилиш во летото 2021 година.
Гвардиола е подготвен на овој чекор, бидејќи е убеден во квалитетот и во тоа што Мусиала може да му понуди на својот тим на теренот. Џамал важи за еден од најдобрите дриблери во Европа кога станува збор за тесните простори. Оваа способност на Германецот го прави доста привлечен во очите на Пеп, бидејќи контролата на топката, а со тоа и на играта е една од најважните точки во играта на Манчестер Сити.
Во меѓувреме, се уште не е познато дали Мусиала претпочита преселба во Премиер лигата, или кариерата ќе ја продолжи во Бундес лигата со Баерн Минхен.