На навивачите нема да им продаваат алкохол на 8-те стадиони на кои ќе се одржи Светското првенство во Катар. Ова е последната одлука на ФИФА, која уште еднаш ги ревидираше своите прописи, на само 2 дена пред почетокот на натпреварувањето. Претходно беше предвидено продажбата на алкохол да се врши и во внатрешноста на стадионите, покрај другите области на градот.
ФИФА во официјалното соопштение појасни:
„По дискусиите меѓу земјата домаќин и ФИФА, одлучено е продажбата на алкохолни пијалоци да се фокусира на празничните места на навивачите и други дестинации, со што ќе се отстранат алкохолните пијалоци од стадионите на Светското првенство во 2022 година. Ова нема да има никакво влијание врз продажбата на Bud Zero, кој ќе остане достапен на сите стадиони на Катар 2022 година. Земјата домаќин и ФИФА ќе продолжат да се грижат за создавање на најзабавното и најпријатното опкружување можно за сите навивачи“.
Бадвајзер е еден од главните спонзори на овој Мундијал и ги има ексклузивните права да продава пиво на Светското првенство. Здружението на фудбалски поддржувачи (ФСА) ја критикуваше одлуката на ФИФА, велејќи дека проблемот лежи во промената на планот во последен момент, со воведување забрана за продажба на пиво. Во изјава за медиумите, ФСА ја коментираше официјалната вест:
„Некои навивачи сакаат да пијат пиво за време на натпреварот, а некои не, но вистинскиот проблем е пресвртот на ФИФА од 180 степени, што укажува на поголем проблем. Недостаток на комуникација и јасност на организацискиот одбор кон навивачите. Ако тие (ФИФА) се предомислат на овој начин, навивачите со право се загрижени за другите ветувања што се дадени во врска со прашањата за сместување, транспорт и културни разлики во Катар“.