Менаџерот на Манчестер Јунајтед, Ерик тен Хег, изјави дека реакцијата на медиумите на натпреварот на неговиот тим во ФА Купот со Ковентри е срамна. И покрај тоа што се пласираше во финалето, Јунајтед доби многу критики по натпреварот против Ковентри. Ова откако „црвените ѓаволи“ ја прокоцкаа предноста од 3-0, а се пласираа дури по изведувањето на пенали, против противниците од Чемпионшип.
Во интервју за новинарите, во пресрет на предизвикот против Шефилд Јунајтед во Премиер лигата, Тен Хег беше многу критичен кон реакцијата на медиумите по натпреварот против Ковентри. Запрашан дали ја разбира негативната реакција, Холанѓанецот рече:
„Не. Апсолутно не. Реакцијата од вас (медиумите) беше срамна. Две финалиња во ФА Купот за 2 години, тоа е фантастично. За мене како тренер 4 финалиња за 4 години. Коментарите се срамни... Фудбалот на крајот на денот се базира на резултати. Успеавме да се пласираме во финалето и тоа го заслуживме. Ја загубивме контролата во последните 20 минути и имавме среќа при изведување пенали, но успеавме да одиме во финалето. Ова е големо достигнување“.
Во меѓувреме во Јунајтед, Бразилецот Антони исто така беше критикуван за неговото славје пред играчите на Ковентри на крајот од пенал-рулетот. Тен Хег исто така појасни за медиумите овој момент:
„Тој (Антони) беше испровоциран и не треба да реагира така. Не ја видовте провокацијата, само реакцијата, но сепак не требаше да го направи тоа... Мораме да му заслужиме на играта на Ковентри, тие успеаја да се вратат во игра по 70 минути каде што доминиравме во играта. Натпреварот требаше да биде затворен на нашата страна, но нивниот пресврт беше прилично добар“.
Манчестер Јунајтед моментално е седми во генералниот пласман во Премиер лигата, а победата над Шефилд Јунајтед е единствениот прифатлив резултат на домашен терен.
