Очекувано, Лео Меси по осми пат во кариерата е прогласен за освојувач на најпрестижниот индивидуален трофеј во фудбалот, Златната топка. Аргентинецот минатата година триумфираше со својата репрезентација на Светското првенство во Катар, а овој успех беше главната причина за неговото осмо крунисување како победник.
Втор по ред во официјалниот пласман за престижниот трофеј беше бомбардерот на Манчестер Сити, Ерлинг Халанд. Норвешкиот напаѓач успеа да ја освои тројната круна уште во првата сезона со „граѓаните“ во Англија. Сепак, се чини дека успехот на Халанд не беше доволен да го засени триумфот на Меси со Аргентина во Катар. Фудбалерот кој веќе е активен со Интер Мајами во МЛС го кажа своето мислење за победата:
„Да се биде повторно овде и да се ужива во овој момент е добро чувство. Го освоив светскиот куп и го остварив мојот сон. Никогаш не можев да замислам дека ќе ја имам оваа кариера и ќе го постигнам сето она што го постигнав. Имав доволно среќа да бидам дел од најдобриот тим во историјата“.
Во меѓувреме, Халанд зборуваше и за своите успеси во текот на минатата сезона. За време на гала вечерта во Париз, бомбашот рече:
„Сакам да му се заблагодарам на Манчестер Сити. Цел клуб. Исто така, сакам да им се заблагодарам на моето семејство и блиските луѓе, бидејќи ме направија она што сум денес“.
Помеѓу другите награди кои беа доделени на важната церемонија беше и наградата за најдобар голман која ја освои Емилијано Мартинез, голманот на Аргентина на Светското првенство и на Астон Вила во Премиер лигата. За најдобар клуб за минатата година е прогласен Манчестер Сити, додека талентот на Реал Мадрид, Џуд Белингем е прогласен за освојувач на трофејот Копа, за најдобар играч на светот до 21 година.